Sunday, January 6, 2013

ආදරණීය පුංචි පුතේ..නුඹට හැකිනම්...

අවට සිටින හැම දෙනම තමන්ගේ හිස් අවුල් කරගෙන
එහි දොස් ඔබට පවරන විට,
ඔබට තම හිස අවුල් නොකරගෙන සිටිය හැකි නම්...

අවට සැම දෙනම ඔබව සැක කරන විට
ඔබට,
තමා ගැන විශ්වාස කළ හැකි නම්...
ඔබට එසේ කිරිමෙන් වෙහෙසට පත් නොවී
බලාපොරොත්තුවෙන් සිටිය හැකි නම්...

අනුන් ඔබ ගැන බොරු කියන විට,
ඔබට බොරු නොකියා සිටිය හැකි නම්...

අනුන් ඔබට වෛර කරද්දී,
වෛර නොකර සිටිමට ඔබට හැකි නම්...
එහෙත්,
අවැසි පමණට වඩා හොඳ බවක්
නොපෙන්වා සිටිය හැකි නම්...

සිහින දැකීමට හැකි වුවත්,
සිහින ඔබේ ස්වාමියා නොකරගෙන සිටිය හැකි නම්...

ඔබට සිතිය හැකි නමුත්,
චින්තනය ඔබේ පරමාර්ථය නොකර ගැනීමට හැකි නම්...

ජය පරාජය දෙකට මුහුණ දී,
ප්‍රතිරූපක බොරුකාරයින් දෙදෙනාටම,
එකසේ මුහුණ දිය හැකි නම්...

ඔබ කියු සත්‍යය දුර්ජනයින් විසින් විකෘතිකොට,
මෝඩයන් හසුකර ගන්නා උගුලක් ලෙස යෙදුවැයි,
අසා දරා සිටීමට හැකි නම්...

ඔබ මුළු දිවියම ගතකර ගොඩනැගූ දේ,
කැඩී සුණු විසුණුවී ගිය විට,
පහත් වී නැවතත් ගෙවීගිය මෙවලම්වලින් වලින් පවා නැවත
තැනීමට ඔබට හැකි නම්...

ඔබ දිනු සියලු දෑ එක ගොඩකට ගසා
එක ඔට්ටුවකට ලබා පැරදී,
නැවත මුල සිට ඇරඹීමට හැකි නම්...
පාඩුව ගැන වචන මාත්‍රයක්වත්
නොදොඩා සිටීමට හැකි නම්...

ඒවායේ ශක්තිය හීනවී ගොස්
සිටුව,නැවත වැඩ කරව්’ යැයි
කීමට පමණක් ඉතිරිව ඇති ශක්තියෙන්
තමාගේ හදවතට,
ස්නායුවලට හා බල නහර වලට අණ දීමට ඔබට හැකි නම්...

රුඳී සිටුවයි’ කීමට වඩා ශක්තියක්
ඔබ තුළ ඉතිරිවී නැතිවුවද,
වැඩ ඉසව්වේ රැඳී සිටීමට ඔබට හැකි නම්...

තමාට වඩා පහළින් සිටින ජනයා සමඟ ඇසුරු කළත්,
තමන්ගේ උසස් ගති කෙළෙසා නොගෙන සිටීමට හැකි නම්...

රජුන් සමඟ උරහිස් හැප්පුවත්,
සාමාන්‍ය ගති නැති නොකරගෙන සිටින්නට හැකි නම්...

සතුරකුටවත්, හිතැති මිතුරෙකුටවත්,
ඔබට, හානියක් කිරීමට නොහැකි නම්...

සියලු දෙනාම ඔබ ගැන බලාපොරොත්තු තැබුවත්,
කිසිවෙක් ඕනෑවට වඩ එසේ නොකරන්නේ නම්...

සමාව නොදෙන සෑම මිනිත්තුවකම,
තප්පර හැටක දිවිල්ලෙන් ඔබට පිරවිය හැකි නම්...

මේ මුලු පොළව හා එහි ඇති සියල්ල ඔබගේය...
මතුද නොව මාගේ පුත,
නුඹ සැබෑ මිනිසෙකි...

A poem by "Radyard Kipling"
සිංහල අනුවාදය : මහාචාර්ය පුෂ්පකුමාර වී. ප්‍රේමරත්න

ප.ලි.
වසර ගනනාවකට පෙර මේ කවි ටික ඉස්සෙල්ලම දැක්ක මොහෙතේ දැනුන හැඟීම මේ වෙලාවෙත් දැනෙනවා...රඩ්යාර්ඩ් කිප්ලිං 1895 දී තමන්ගේ පුතාට ලියපු මේ කවි පෙල එදාටත් වඩා අදට වලංගුයි.මොකද සල්ලි වලට තමන්ගේ ආත්මය පවා විකුණන මිනිසුන් බිහිවන යුගයක,සැබෑ මිනිසෙකු තැනීමට මෙය මග පෙන්වන නිසයි...
සිංහල අනුවාදය උපුටා ගැනීම Knowledgescope වෙබ් අඩවියෙනි...

3 comments:

  1. This comment has been removed by the author.

    ReplyDelete
  2. Replies
    1. ස්තූතියි ප්‍රතිචාරයට...

      Delete

Popular Posts

Total Pageviews

Powered by Blogger.

Followers

සුළඟ වගේ...... හිටියත් නෑ වගේ...නැතත් හිටිය වගේ....

My Blog List